«Chelsi» bosh murabbiyi Joze Mourino jamoadan ketish haqida o‘ylamayotganini ta’kidlab
o‘tdi.
«Men o‘yinimizdan noroziman va norozi bo‘layotganimdan xursandman. Agarda mag‘lubiyatlardan ham ko‘nglim to‘q bo‘lganida, demak boshqacha Mourinoga aylanib qolgan bo‘lardim.
Men o‘zgarishni istamayman. Ayni vaqtdagi holatdan xursand emasman, ammo avvalgidan ko‘ra ko‘proq ishlamoqdaman. Men optimistman, chunki futbolchilarga ishonaman, ular esa menga. Biz birga qiyinchiliklarni engib o‘tamiz.
«Chelsi»dan har qanday vaziyatda ham ketmayman. Va klub ham meni iste’foga chiqarishni istamaydi. Agarda kimdir boshqacha o‘ylasa, demak u asl vaziyatdan bexabar.
Bizda faqat bir muammo bor. Biz o‘zimiz istagan natijaga erisha olmayapmiz», - deydi Mourino.
Eslatib o‘tamiz, ayni vaqtda «Chelsi» Angliya chempionatida 4 turdan so‘ng bittagina o‘yinda g‘olib chiqib, musobaqa jadvalida 13-o‘rinni egallab turibdi.