Aktrisa Shahzoda Matchonova go‘zallik haqidagi mulohazalari bilan bo‘lishdi: —«Men uchun go‘zallik, bu birinchi navbatda, insonning o‘zini qanday tutishida! U atrofdagilar bilan o‘zini qanday tutyapti? Agar u kimligidan qat’iy nazar, boshqalarga, hurmat bilan muomala qilsa, masalan, mashhur inson bilanmi, yoki oddiy sotuvchi bilanmi, hamma bilan ajratmay, birdek yaxshi munosabatda bo‘lsa, demak, shu insonda insoniy go‘zallik bor, deb hisoblayman! Men uchun go‘zallik bu, birov insonga qo‘pol munosabatda bo‘lsa ham, unga nisbatan shunday munosabatda javob qaytarmaslik, uning darajasigacha tushib, unga javoban past ketmaslik, mana shuni ham men go‘zallik, deb hisoblayman! Chinakam go‘zallik, bu boshqalarga bo‘lgan munosabatda, muomalada namoyon bo‘ladi! Ba’zilar go‘zallikni faqat chiroyli yuzda bo‘ladi, deyishlari mumkin. Ammo, hozir yuz go‘zalligi muammo emas! Bir nechta ukol, yoki plastik jarrohlik bilan go‘zal bo‘lish qiyin emas! To‘g‘ri, go‘zal suratga uzoq vaqt tikilish mumkin, ammo unda mazmun ham bo‘lishi kerak! Dunyoda go‘zal insonlar ko‘p, ayniqsa hozir mablag‘ bilan go‘zal bo‘lish imkoni bor, hamma birdek go‘zallashmoqda! Yuzi go‘zal insonlarni topish juda oson, ammo qalban, harakatlari, muomalasi, munosabat taraflama go‘zal insonlarni topish qiyin! Undaylar afsuski, juda kam uchraydi. Ayniqsa, inson hasadgo‘y bo‘lmasa, haqiqiy go‘zallik mana shunda! Agar insonda hasad bo‘lsa, yuragi qora bo‘lib, ko‘nglida “mana bu bilan munosabat o‘rnatsa bo‘ladi, bu bilan yo‘q”, deb odam ajratsa, “chunki, bu badavlat, bunisini mavqeyi bor, bunisi esa oddiy odam” deb, tanlab o‘tirsa, uning qandayligi baribir bilinib qoladi! Ming plastik jarrohlik qildirmasin, ming go‘zal bo‘lmasin, qalban xunukligi, hasadgo‘yligi, baribir hatti-harakatlarida namoyon bo‘lib qoladi! Men o‘zim shaxsan, plastik jarrohlik yoki kiprik ulashlarga qarshi emasman, ammo, menimcha, insonlar tashqi go‘zallikka zo‘r bergan holatda, eng muhimi qalb go‘zalligi haqida unutib qo‘yishmoqda. Odatda ayollar, erkak kishi uchun, tashqi go‘zallik muhim, deb o‘ylashadi. Yo‘q, aqlli erkak uchun, birinchi o‘rinda qalb go‘zalligi, tarbiya, bilim, tashqi go‘zallikdan avval muhimroq bo‘ladi.Siz uchun guzallik nimada?» — deb murojaat etadi Shahzoda Matchonova ijtimoiy tarmoqdagi sahifasida.
Manba: Diydoraziz.uz