Ispaniya Oliy sudi Coca-Cola kompaniyasining mamlakatdagi 11 ta korxonasidan 4 tasidagi 821 nafar xodimining qisqartirilishini noqonuniy deb topdi, deb xabar bermoqda mahalliy OAVlar.
2014 yilning boshida Coca-Cola rahbariyati Ispaniyadagi 11 ta zavodidan 4 tasini yopish haqida qaror qabul qilgan. Korxonaning qayta tashkil etilishi oqibatida 821 xodim ishdan bo‘shatilgan, yana 400 mutaxassisga kompaniyaning boshqa zavodlaridan ish joyi taqdim qilingan.
2014 yil iyunda Ispaniya Milliy sudi bu qisqartirishlarni noqonuniy deb topgan. Oliy sud Coca-Cola’ning ushbu qaror yuzasidan bergan da’vo arizasiga rad javobini berib, avval chiqarilgan qarorni ma’qulladi. Sud kompaniya bo‘yniga ishdan bo‘shatilgan xodimlariga o‘tgan davr ichidagi oyliklarini to‘liq hajmda to‘lab berish majburiyatini qo‘ydi.