O‘zbekiston Respublikasiga chetdan olib kiriladigan tovarlarga hisoblanadigan bojxona to‘lovlarining miqdori har bir tashqi iqtisodiy faoliyat ishtirokchisini qiziqtirishi tabiiy.Shu sababli, tadbirkorlarga qulaylik tug‘dirish maqsadida Davlat bojxona qo‘mitasi “Bojxona kalkulyatori” interaktiv elektron xizmatini taqdim qiladi.
Mazkur xizmatdan foydalanish orqali chetdan olib kelinishi mo‘ljallanayotgan tovarlar bo‘yicha to‘lanadigan bojxona to‘lovlarini oldindan hisoblab chiqarish imkoniyatiga ega bo‘linadi.
Buning uchun mazkur axborot tizimiga tovarning Tashqi iqtisodiy faoliyat tovarlar nomenklaturasidagi (TIF TN) kodini, tovar ishlab chiqarilgan, jo‘natilayotgan hamda uni sotayotgan davlatlarni belgilash, tovar miqdori va bojxona qiymati haqida ma’lumotlarni kiritish kifoya.
Tovarning bojxona qiymatini belgilashda Davlat bojxona qo‘mitasi veb-saytining “Ochiq ma’lumotlar” bo‘limiga joylashtirilgan Narx ma’lumotlari byulletenidan ham foydalanish mumkin.