Toshkentda bo‘lib o‘tgan Xalqaro meva-sabzavot yarmarkasida meva-sabzavotlarni eksport qilish bo‘yicha 270 shartnoma tuzildi.
Toshkentda 12−16 iyul kunlari bo‘lib o‘tgan I Xalqaro meva-sabzavot yarmarkasida meva-sabzavot mahsulotlarini eksport qilish bo‘yicha qiymati 2 milliard AQSh dollaridan ziyod bo‘lgan 270 shartnoma imzolandi, deya
xabar beradi "gazeta.uz".
Eksport qilinadigan mahsulotlarning 27 foizini sabzavotlar, 25 foizini uzum, 20 foizini mevalar, 17,6 foizini quritilgan va qayta ishlangan mahsulotlar, 8,4 foizini dukkakli mahsulotlar, 2 foizini qovun tashkil qildi. Yarmarka nihoyasiga etgan bo‘lsa-da, shartnomalar tuzish ishlari davom etmoqda.
Yarmarkada O‘zbekistonning meva-sabzavot sohasi mahsulotlarini butun respublikadan 170 dan ziyod kompaniyalar ishtirok etdi. Marosimda AQSh, Britaniya, BAA, Janubiy Koreya, Yaponiya, Italiya, Fransiya, Malayziya, Hindiston, Rossiya, Latviya, Ozarbayjon, Turkmaniston, Eron, Afg‘oniston, Qozog‘iston va boshqa mamlakatlari tadbirkor doiralarining 300 dan ziyod vakillari ishtirok etdi.