Avvalroq, poytaxtdagi Milliy matbuot markazida “O‘zbeknavo” estrada birlashmasi tomonidan taniqli xonandalar, san’atshunoslar va OAV vakillari ishtirokida matbuot anjumani tashkil etilgani haqida xabar bergan edik. Unda ishtirok etgan mohir sozanda va xonanda, O‘zbekistonda xizmat ko‘rsatgan artist Toir Asqar telekanallar ma’muriyatiga nisbatan e’tirozini bildirdi, deb xabar berdi "Qalampir.uz" sayti.“Xonandalar ko‘payib ketyapti. Haqiqiy san’atkorlar esa TV va radiolarda kam chiqadi. Aslida yaxshi qo‘shiqlarimiz juda ko‘p. TVda chiqayotgan yosh xonandalarning homiysi bor, ular ma’lum vaqtlarni sotib olish imkoniyatiga ega. Katta san’atkorlar esa yo televideniega borib pul to‘lashga erinadi, yo bunga mablag‘i yo‘q, yo bo‘lmasa ularga rag‘bat qilinmaydi. Shuning uchun ham “otarchi”lar TVga chiqyapti, televizorga chiqishi kerak bo‘lgan haqiqiy san’atkorlar esa to‘yda pul topib yuribdi.
Men shuni iltimos qilardimki, haqiqiy san’atkorlarning ijodini xalqqa etkazish, milliy qo‘shiqlarni targ‘ib qilish uchun TVlarda ma’lum vaqt ajratilsin. Iqtidorli ijodkordan mablag‘ talab qilish kerak emas. Aksincha, uning ijodiga ko‘mak berish, yordam qo‘lini cho‘zish kerak”, deydi Toir Asqar.
Yuqorida aytilgan fikrlarni matbuot anjumanida o‘tirgan taniqli san’atkordan tortib, jurnalistlar ham qo‘llab-quvvatladi. “O‘zbenavo” estdara birlashmasi Bosh direktori o‘rinbosari Murodjon Majidov Toir Asqarning talabiga javob qaytarar ekan, ayni damda “O‘zbeknavo” estrada birlashmasi qoshida “Yagona badiiy kengash” tuzish ishlariga start berilganini, mazkur loyiha amalga oshirilgach, telekanallarning o‘zbilarmonchiligiga nuqta qo‘yilishini alohida ta’kidladi.
Yig‘ilish davomida “MY5” telekanalining bugungi faoliyati, unda efirga uzatilayotgan kliplar yoshlar ma’naviyatiga salbiy ta’sir ko‘rsatayotgani muhokama qilindi.