Avvalroq, shoir Ahad Qayum muxlislar talablariga binoan Ahmadboyga atab she’r yozgani haqida
xabar bergan edik. Shoir bu gal O‘zbekiston xalq artisti Sherali Jo‘raevga atab she’r
yozdi.
Shoir o‘zbek milliy san’atining darg‘alaridan bo‘lgan Sherali Jo‘raev ijodi haqida so‘z ochar ekan, kechagina chiqqan “yulduzcha”lardan tortib, taniqli san’atkorlarni ham Sherali Jo‘raevning ortidan bo‘hton qilmaslikka undaydi. Ushbu she’rni Jo‘raevning to‘ng‘ich o‘g‘li Shohjahon Jo‘raev Instagram’dagi shaxsiy sahifasiga joylashtirdi.
Birorta ustozning qo‘lin tutmagan,
Umrida bir bora jonli aytmagan.
Ovozi birorta tonda turmagan,
Sheralini g‘iybat qilmasin.
“Birinchi muhabbat” deya oqqanlar,
“Gulbadan”dan dilga olov yoqqanlar.
“O‘zbegim”ni aytib bola boqqanlar,
Sheralini g‘iybat qilmasin.
Hasaddan tunlari uyqusi kelmay,
San’at devoriga bitta g‘isht qo‘ymay.
O‘zining otasin kimligin bilmay,
Sheralini g‘iybat qilmasin.
Bugun uni hech kim bilmagan bo‘lsa,
Ovozidan ko‘ngli to‘lmagan bo‘lsa.
Umrida omadi kelmagan bo‘lsa,
Sheralini g‘iybat qilmasin.
Bir paytlar qo‘shig‘in tinglab yig‘lagan,
Suratin qo‘yniga solib uxlagan.
Nega muxlisbo‘lib nomin bulg‘agan?
Sheralini g‘iybat qilmasin.
Mayli, tan olmagin Ahad Qayumni,
Olloh o‘zi berar so‘nggi hukmni.
Nafratiga uchrab ona xalqimni,
Sheralini g‘iybat qilmasin.