Avvalroq, Toshkent viloyati huquq-tartibot organlari tomonidan Chinoz tumani “O‘zbekiston” qishloq fuqarolar yig‘ini Navoiy ko‘chasi 85-uyda yashovchi fuqaro Tursunboyev Ahmadjon Hamidovich hibsga olinib, unga nisbatan jinoiy ish qo‘zg‘atilgani haqida
xabar bergan edik. Unga ko‘ra, Tursunboyev bir necha yillar davomida yiliga kamida 100 foizlik dividend to‘lash, ya’ni ikki barobar qilib qaytarishni va’da qilib, juda katta miqdordagi omonat mablag‘larini milliy va xorijiy valyutada qabul qilish bilan noqonuniy ravishda shug‘ullanib kelgan. Bundan tashqari, “tadbirkor” yiliga 40 foizlik ustama to‘lash sharti bilan aholiga qarz berib kelgan. Bu haqda 16 iyun kuni “Toshkent” teleradiokanali orqali maxsus ko‘rsatuv ham namoyish etilgan edi, deb
yozadi "Qalampir" nashri.
Dastur efir yuzini ko‘rgach, Ahmadboyni tanigan ham tanidi, tanimagan ham... O‘zbekiston milliy teleradiokanalidan olingan ma’lumotlarga qaraganda, ertaga, 30 iyun kuni “O‘zbekiston”, “Toshkent”, “Yoshlar” teleradiokanallarida Ahmad Tursunboyevning noqonuniy faoliyati, u tashkil etgan “moliyaviy piramidi” va uning ortidagi kirdikorlar haqida “Ahmad vasvasasi” nomli ko‘rsatuv efirga uzatiladi. Aytilishicha, ko‘rsatuvdan Ahmad Tursunboyevni so‘roq qilish jarayoni ham o‘rin olgan.
Dastur “O‘zbekiston” teleradiokanalida soat 18:00da, “Toshkent” teleradiokanalida soat 19:15da, “Yoshlar” teleradiokanalida esa soat 20:20da namoyish etiladi.