Ijtimoiy tarmoqlar bugun ko‘plab soha vakillari uchun nafaqat vaqt o‘tkazish uchun vosita, balki o‘z faoliyatini amalga oshirishda ko‘makchi vazifasini ham o‘tamoqda. Ayniqsa, undan ro‘yxatdan o‘tgan shou-biznes vakillari ijtimoiy tarmoqlar orqali muxlislari bilan bemalol suhbat qurish imkoniyatiga egalar, deb yozmoqda "Qalampir" nashri.O‘zbekistonda xizmat ko‘rsatgan artist Rayhon G‘anieva ham Instagram’da birinchilardan bo‘lib shaxsiy sahifasini ochgan o‘zbekistonlik mashhurlardan sanaladi. Bugun uni kuzatib borayotganlar soni 500 ming nafardan ortdi. Xonanda bu haqda quvonchi ichiga sig‘may shunday yozadi:
“Mening yonimda shuncha yil bo‘lganingiz uchun rahmat. Hayotimdagi turli lahzalarda yonimda turganingiz uchun rahmat. Menig ijodimni kuzatib borganingiz uchun rahmat. Shunchaki yonimda ekanligingizga rahmat. Sizning izohlaringiz va qo‘llab-quvvatlashingiz men uchun juda zarur. Har biringizni yaxshi ko‘raman va qadrlayman!”.
Rayhonning iliq fikrlariga nisbatan uning ashaddiy muxlislari javob qaytarar ekan, ijtimoiy tarmoqdan fodalanishining asosiy sababi Rayhonni ko‘rish ekanini aytadi.
Tahririyatimiz xodimlari Rayhon G‘anievaning yozganlari bahonasida o‘zbek shou-biznesining taniqli ayollari Instagram’ini kuzatib, kuzatuvchilar sonini solishtirib chiqdi. Ayni damda Instagram’dan ro‘yxatdan o‘tgan xonandalar orasida kuzatuvchilarining ko‘pligi bilan birinchi o‘rinni xonanda Shahzoda egallab turibdi. Uning kuzatuvchilari bugungi kunga kelib 720 mingdan oshgan.
Ikkinchi o‘rinni esa O‘zbekistonda xizmat ko‘rsatgan artist Rayhon G‘anieva egalladi.
Aktrisalar orasida esa Asal Shodieva peshqadam. Bugun uni 493 ming kishi kuzatib kelmoqda.
Ochiq-sochiq liboslardagi suratlari sabab xonanda Lola Yo‘ldoshevaning ham kuzatuvchilari soni ortib ketdi. Bugun uni Instagram’da 439 mingdan ortiq foydalanuvchi kuzatib kelyapti.
Keyingi o‘rinda esa 419 ming foydalanuvchini o‘ziga qaratgan aktrisa Zarina Nizomiddinova turibdi. Uning suratlari ham Lola Yo‘ldoshevanikidan qolishmaydi.
Loladan keyingi o‘rinlarni esa 404 ming kuzatuvchi bilan xonanda Munisa Rizaeva, 382 ming nafar kuzatuvchi bilan “Nihol” mukofoti sovrindori Manzura Yo‘ldosheva va 377 ming kuzatuvchi bilan Nilufar Usmonova egallagan.