Xitoyning Shandun provinsiyasidagi Sindao shahrida yaqin vaqt ichida mamlakatdagi ilk yo‘nalishli jamoat elektrobuslari ishga tushiriladi. Bu haqda «Daryo»
xabar bermoqda.
Ekologik toza transport simsiz quvvatlantirish tizimi yordamida elektr quvvati oladi.
Loyiha Germaniyaning Bombardier kompaniyasi bilan hamkorlikda amalga oshirilmoqda. Yaqinda kompaniya Sindao shahrining Siyaxan tumanida joylashgan Xitoy-Germaniya ekologik bog‘i bilan bu borada kelishuvga erishgan edi.
Loyiha doirasida qisqa va o‘rta masofali ikki tajribaviy yo‘nalish ishlab chiqiladi, ularda 20 ta jamoat elektrobusi qatnovi yo‘lga qo‘yiladi.
200 kVt quvvatga ega simsiz quvvatlantirish tizimlari to‘xtash bekatlarida joylashtiriladi. 60 kVt/soat quvvatli batareyalarni magnit maydoni yordamida quvvatlantirishga bor-yo‘g‘i 30 sekund ketadi. Ya’ni yo‘lovchilar avtobusdan tushayotgan vaqtda mashinalar quvvat olib bo‘ladi.
Bu tizim avtobus vaznini 2 tonnaga kamaytirish, energiya sarfini 15 foizga qisqartirish imkonini beradi. Elektrobus sig‘imi standart avtobuslarga nisbatan 12 kishiga ko‘proqdir.
Bunday tipdagi elektrobuslar Germaniyaning Berlin va Mangeym shaharlarida ishlaydi.