Avvalroq, taniqli suxandon, “Million” jamoasining a’zosi Davron Kabulov 23 may kuni uylangani haqida
xabar bergan edik. Poytaxtdagi “Mumtoz” restoranida bo‘lib o‘tgan to‘y oqshomiga o‘zbek shou-biznesining eng taniqli vakillari jam bo‘lishdi. Ular orasida O‘zbekiston xalq artistlari Farrux Zokirov hamda Yulduz Usmonova ham bor edi. Usmonova sahnaga chiqib, ikki yoshni qutlar ekan, yoshlarga biroz nasihat ham qildi. Bu haqda “Qalampir.uz”
xabar berdi.
“San’atkorlarning to‘yida shunchaki o‘tirishga haqqimiz yo‘q. Chunki hamma odamlarning to‘yida tik turib xizmatda bo‘ladigan ham aynan san’atkorlar. Davron va E’zozaga baxt tilar ekanman, shuni alohida aytaman: san’atkorlar hech qachon oilasidan ajralmasin. Boisi ular har tarafdan xalqqa, muxlislarga o‘rnak bo‘ladi”, deydi O‘zbekiston xalq artisti Yulduz Usmonova.
Xonandaning nasihatlarini san’at ahli vakillari qanday qabul qilgani bizga qorong‘u, biroq uning aytganlarida jon bor. Bugun san’atkorning har bir xatti-harakati muxlislariga, xususan, yoshlarga namuna bo‘lmoqda. Buni o‘z vaqtida tushunish esa faqat yaxshilikka xizmat qiladi.