Agar doimiy ravishda bolaga baqirilsa, bu jiddiy oqibatlarga olib kelishi mumkin, bu esa uning jismoniy holatiga ta’sir qiladi va hatto semirishga olib kelishi mumkin. Bunday xulosaga Ayovalik olimlar kelishdi. Tadqiqot natijalari to‘g‘risida Fox News yozadi, deb xabar beradi "Darakchi" nashri."Tarbiya jarayonidagi qo‘pollik salomatlikda jiddiy jismoniy muammolarni keltirib chiqaradi", — deydi tadqiqot muallifi Tomas Shofild.
Iowa Youth and Families Project guruhi o‘tkazgan tadqiqotda 12 yoshli 451 nafar o‘smir va ularning ota-onalari ishtirok etdi. Olimlar bolalar 20 yoshga etgunga qadar bir necha yillar davomida oiladagi muhitni kuzatishdi.
Har bir ota-onaga qo‘pollik reytingi bo‘yicha baho berildi, unda jismoniy agressiya, ta’qiqlar, nimadir amalga oshirishga zo‘rlash, xudbinlik yoki bolaga ovoz ko‘tarish kuzatilgan. Tajriba yakunlariga ko‘ra bolalarning jismoniy ahvoli o‘rganildi.
Shofildning ta’kidlanishicha, tarbiyadagi shafqatsizlik bola uchun surunkali stress muhitini yaratadi, buning asoratlari esa bola katta bo‘lganida ham namoyon bo‘lishi mumkin. Bunday tarbiya bolaning rivojlanayotgan miyasiga ta’sir qilishi mumkin. Tadqiqotlarda aniqlanishicha, boshqa salbiy oqibatlari bilan birga gormonal o‘zgarishlar, shamollashlar hamda yurak qon tomir faolligi susayishi kuzatilishi mumkin.
"Bizdan talab etiladigan eng yaxshi narsa bu ota-onalarni o‘ta qattiqo‘llikdan qaytarish. Agar biz to‘laqonli sog‘lom farzand ulg‘ayishini istasak, buning eng to‘g‘ri yo‘li, — shafqatsizlik va qahr ko‘rsatishdan qochishdir", — deydi Shofild.