Спорт тадқиқотлари халқаро маркази (CIES) Европанинг «кучли бешлик» чемпионатларида тўп сураётган футболчиларнинг трансфер нархларини маълум қилди, деб хабар бермоқда Kun.uz.Ушбу рўйхатда энг қиммат футболчи сифатида Лионель Месси қайд этилган – унинг нархи 220 миллион еврога баҳоланган. Иккинчи ўриндаги Криштиану Роналдунинг трансфер қиймати тадқиқот маркази томонидан 133 миллион евро қилиб белгиланган. “Челси” ярим ҳимоячиси Эден Азар эса 99 миллион евролик футболчи сифатида кўрилган.
Шунингдек, “қимматбаҳолар” ўнталигидан қуйидаги футболчилар ўрин олган: Диега Коста (“Челси”, 84 миллион евро), Поль Погба (“Ювентус”, 72 миллион евро), Серхио Агуэро (“Манчестер Сити”, 65 миллион евро), Рахим Стерлинг (“Ливерпуль”, 63 миллион евро), Сеск Фабрегас (“Челси”, 62 миллион евро), Алексис Санчес (“Арсенал”, 61 миллион евро), Гарет Бэйл (“Реал”, 60 миллион евро).
Футболчиларнинг қиймати бир қанча омиллар асосида белгиланган. Жумладан, 2009 йилдан буён футболчилар ўтказган ўйин, урган голлар, клублари ва терма жамоалари қайд этган натижалар ўрганиб чиқилгач ва уларнинг трансфер қиймати чиқарилган.
Месси бу борада етакчи бўлишига у ўтган йиллар давомида қўлга киритган кўпдан-кўп ютуқлар, хусусан 4 марта “Олтин тўп” мукофотини қўлга киритиши (2009, 2010, 2011, 2012) асос бўлган.
фото: kun