Германия терма жамоасининг собиқ сардори, «Бавария» ва «Челси» клуби собиқ яримҳимоячиси Михаэль Баллак ФИФА томонидан ЖЧ иштирокчилари сони 32тадан 48тага етказилишига муносабат билдирди.«Бу масъулиятсизлик белгиси. Улар футболнинг ривожига ҳужум қилишди.
Албатта бу қарор бир овоздан қўллаб қувватланди», дея кинояли изоҳ берган Баллак.
Эслатиб ўтамиз, ФИФА 2026 йилдан бошлаб жаҳон чемпионатларида иштирок этувчи жамоалар сонини 32тадан 48тага, гуруҳлар сонини эса 8тадан 16тага оширилгани ҳақида қарор қабул қилганди.
Ҳозирча янги турнир қандай кўринишда бўлиши номаълумлигича қолмоқда. Терма жамоалар сони ошгани туфайли турнирга мезбонлик қиладиган давлатда стадионлар ва меҳмонхоналар етарлича кўп бўлиши керак. 2026 йилги ЖЧ мезбони бўлиш учун асосий даъвогар АҚШ ҳисобланади. Шунингдек, тарихда илк марта мундиал 3 давлат бўйлаб ўтказилиши ҳам мумкин.
Гуруҳларда дуранг натижалар бўлмайди, асосий вақтда дуранг қайд этилса, ғолиб пенальтилар сериясида аниқланади, кейинги босқичга 16 гуруҳдан 32 жамоа йўл олади. Шу билан бирга ФИФА турнир ўтказиладиган кунлар сонини ўзгартирмаслик, дам олиш кунлари аввалгидек қолиши ҳамда финалгача 7та ўйин ўтказилишини таъминлайди.
2016 йилги ЖЧ регламенти ҳозирча ишлаб чиқилмаган, конфедерацияларга нечтадан ўрин ажратилиши ҳам номаълум. Катта эҳтимол билан Африка ва Осиё учун кўпроқ ўрин ажратилади.