Мўғилистон пойтахтида ўтаётган спорт курашлари бўйича Рио Олимпиадасига йўлланма берувчи квалификацион мусобақа давом этмоқда. Айни дамда учинчи кун доирасида эркин курашчилар баҳс олиб боришмоқда. Бу ҳақда "Sports.uz" хабар бермоқда.
Бироз аввал -97 килограмм вазн тоифасида иштирок этаётган Магомед Ибрагимов Рио Олимпиадаси йўлланмасини нақд қилди. Дастлаб кореялик Жаеганг Ким, кейин эса япониялик Такеше Ямагучи доғда қолдирилди. Ярим финалда вакилимизга мўғилистонлик Худербулга Доржханд рақиблик қилди. Бу полвон ҳам енгилгач, Магомед финал билан бирга Олимпиада йўлланмасини ҳам нақд қилди. Ибрагимов олтин медаль учун арманистонлик Георги Кетоевга қарши баҳс олиб боради.
-86 килограмм вазнда беллашаётган Умиджон Исманов ярим финалгача мардонавор етиб келди. Афсуски, финал учун кечган баҳсда америкалик Майкл Кохга, бронза медали учун кечган беллашувда эса польшалик Збигниев Барановскига мағлуб бўлди. Вакилларимиздан Ҳасанбой Раҳимов ва Нодиржон Сафаров медаллар учун курашдан эрта чиқиб кетишди.