Халқаро олимлар гуруҳи уйқуга кетишдан олдин смартфондан фойдаланувчи болаларда уйқу чала бўлиши ва семириш хавфи ошиши ҳамда хавотирлилик кучайишини аниқлашди. Бу ҳақда Kun.uz нашри маълум қилди. Мутахассислар 11-12 ёшдаги 6616 болани ўрганишда олинган маълумотларни таҳлил қилиб чиқишди. 70 фоиздан кўпроқ бола кечки уйқудан олдин камида бир соат смартфон ёки экрани бор бошқа қурилмадан фойдаланишини айтган. Сўров давомида болалар бу вақтда хонадаги ёруғлик, қанча соат ухлашлари ва ухламасликлари, ухлаш билан боғлиқ муаммолардан азият чекиш-чекмасликлари ҳақидаги маълумотларни ҳам кўрсатишган.
Аниқланишича, чироғи ёқилган уйда смартфондан фойдаланган ёки телевизор кўрган болалар 31 фоиз кўпроқ ёмон ухлашган. Бу ишни қоронғида қилган болаларда уйқу бузилиши эҳтимоли 147 фоизга кўтарилган. Шунингдек, меъёрида бўлмаган уйқу иммунитет пасайиши, тушкунлик, хавотирлилик ва семириш билан боғлиқлиги кўрсатилган.
Баҳолашларга кўра, дунёда 90 фоиз ўсмирлар кунига тавсия қилинган 11 соатдан камроқ ухлашади ва мутахассислар буни гаджетлар тарқалгани билан тушунтиришмоқда. Буюк Британиянинг ўзида 12 ёшдан 15 ёшгача бўлган болаларнинг 98 фоизи телевизор кўрар, 90 фоиздан кўпроғи смартфондан фойдаланар экан.