Фото: Давлат ёнғин хавфсизлиги хизматиАндижонда газ тўлдираётган 2 та Damas автомобилида ёнғин содир бўлди. Бу ҳақда Давлат ёнғин хавфсизлиги хизматининг ОАВ билан ҳамкорлик қилиш бўлинмаси хабар берди.
12 август куни соат 12:40 да Андижон вилояти Улуғнор тумани «Сариқсув» МФЙ ҳудудида жойлашган «Виктория газ сервис» МЧЖга қарашли автомобилларга газ тўлдириш компрессор шохобчасининг 6-колонкасида газ тўлдираётган 2 та автомобилда ёнғин содир бўлаётгани ҳақида ёнғин-қутқарув хизматига хабар келиб тушган.
Ёнғинни бартараф этишга 2 та ёнғин ўчириш бўлинмаси жалб этилган. Бўлинмалар воқеа жойига соат 12:50 да етиб борган ва ёнғин соат 12:52 да қуршаб олиниб, соат 13:00 да тўлиқ бартараф этилган.
Ёнғиннинг кенг майдонга тарқалиб кетиши олди олинган. Тан жароҳати олганлар ва ҳалок бўлганлар йўқ. Ёнғин оқибатида АГТКШнинг 6-колонкасида газ тўлдираётган фуқаро Х.Х.га тегишли Damas русумли автомобилда ёнғин содир бўлиб, аланга унинг орқасида навбатда турган фуқаро Ж.Ғ.га тегишли Damas русумли автомобилига ҳам ўтган. Натижада иккала автомобиль тўлиқ ёниб зарарланган. Ёнғин сабаби ва моддий зарар миқдори аниқланмоқда.