Ўзбекистон Республикаси Миллий гвардияси Ҳарбий-техник институтида 2019 йил битирувчиларининг Якуний давлат аттестацияси синовлари бошланди. Якуний давлат аттестацияси синовларида курсантлар ижтимоий-гуманитар, ихтисослик фанларидан ва чет тиллари бўйича баҳоланиш билан бирга мутахассислик бўйича Битирув (диплом) иши ҳимоясини ўтказадилар. Шуни таъкидлаш жоизки, Якуний давлат аттестацияси синовлари нуфузли олий таълим муассасаларидан келган профессор-ўқитувчилардан таркиб топган комиссия аъзолари иштирокида қабул қилинади.
Бу йилги синовларда Ўзбекистон Республикаси Миллий гвардияси қўмондонлиги ва Марказий девон мутасадди раҳбарлари, ҳамкор вазирликлар мутахассислари, ИИВ Академияси “Жиноят ва жиноят ижроия ҳуқуқи” кафедраси бошлиғи ю.ф.н. подполковник Ражабов Бахтиёр Алмахматович, Низомий номидаги Тошкент давлат педагогика университети п.ф.н., профессор Жалолов Жамол Жалолович ҳамда Мирзо Улуғбек номидаги Ўзбекистон Миллий университетининг Ижтимоий фанлар факультети “Фалсафа ва мантиқ” кафедраси мудири, ф.ф.д., профессор Мадаева Шахноза Омоннулаевна, Тарих факультети “Ўзбекистон тархи” кафедраси доценти т.ф.н. Полвонов Неъмат Тўраевич ва бошқа илм-фан вакиллари иштирок этмоқдалар.
“Ҳарбий таълим муассасалари ичида Миллий гвардиянинг курсантлари хорижий тилларда эркин, равон гапира олиши, кенг дунёқарашга эга эканликлари билан ажралиб турадилар. Бу якуний давлат аттестацияси синовларида ўз тасдиғини топди. Кучли билим, кенг тафаккурга эга, ҳар қандай вазиятда тўғри ва аниқ қарор қабул қила оладиган офицерлар халқимиз манфаатлари йўлида хизмат қилишига ишонамиз”, – деб фикр билдирди профессор Жамол Жалолович.
Адолат ва шаффофлик тамойиллари асосида ўтказилаётган Якуний давлат аттестация синовларида гуманитар ва ижтимоий-иқтисодий фанлар бўйича фанлараро якуний аттестацияси комиссияси раиси сифатида иштирок этаётган профессор Шахноза Мадаева Ўзбекистон Республикаси Миллий гвардияси Ҳарбий-техник институти битирувчи курсантлари 4 йил давомида эгаллаган билим ва кўникмаларини амалиётда бемалол татбиқ эта олишларига ишонч билдириб, келгусида илм олишга бўлган иштиёқлари асло сўнмаслиги ва Ватанимиз равнақи йўлида фидокорона хизматлари билан барчага намуна бўлишларини тиладилар.
Лейтенант Нозима Махмудова