2019 йил Тошкентда нуфузли халқаро мода ҳафталиги ўтказилади

^{Фото: Ўзбекистон Хотин-қизлар қўмитаси матбуот хизмати}
Ўзбекистон вакиллари Қозоғистонда ўтказилган халқаро мода ҳафталигида иштирок этди.

Тараз шаҳрида ташкил этилган “Aspara Fashion Week” Халқаро мода ҳафталиги ўзбекистонлик дизайнерларнинг ишлари АҚШ, Италия, Буюк Британия, Франция, Туркия, Сербия, Россия, Ҳиндистон, Грузия, Хитой, Голландия ва бошқа давлатлардан ташриф буюрган машҳур дизайнерлар томонидан қизиқиш билан кутиб олинди.

Ўзбекистон Хотин-қизлар қўмитаси матбуот хизмати томонидан хабар қилинишича, тадбир доирасида Ўзбекистон Хотин-қизлар қўмитаси ва Қозоғистон Республикаси “АТАМЕКЕН” тадбиркорлар палатаси ҳудудий бўлими ва “Қозоғистон тадбиркор аёллар ассоциацияси” Республика нодавлат жамоат ташкилоти раҳбарлари билан давра суҳбати ташкил этилди.

Ўзбекистон Хотин-қизлар қўмитаси ва Аёллар ва оилавий демография сиёсати миллий комиссияси ўртасидаги англашув меморандуми доирасида қўмита таъсисчилигида ташкил этилган “Nafis Travel” МЧЖ билан Қозоғистон Республикаси Жамбил вилояти “Ички ва ташқи туризм ассоциацияси” ҳамда “Жамбил Туризм саноати ассоциацияси” ўртасида ҳамкорлик меморандумлари имзоланди. “Aspara Fashion Week” халқаро мода ҳафталигини 2019 йилда Тошкент шаҳрида ўтказишга келишиб олинди.