"Жамият" газетаси мухбири, шунингдек, Самарқанд вилоят газетаси муҳаррири бўлган шахс боғча мудираси билан тил бириктириб, жиноятга қўл урди. Бу ҳақда Бош прокуратура Матбуот хизмати раҳбари маълум қилди.Келтирилишича, Бош прокуратура ҳузуридаги Иқтисодий жиноятларга қарши курашиш департаменти Самарқанд вилояти бошқармаси ҳамда вилоят ИИБ ходимлари билан ҳамкорликда ўтказилган тезкор тадбирда фирибгарлик ва пора беришга далолат қилиш жинояти фош этилди.
Хусусан, Каттақўрғон туманидаги боғча мудираси Т.Э. “Каттақўрғон ҳақиқати” газетаси муҳаррири (“Жамият” газетасининг мухбири) Ш.Қ. билан тил бириктириб, тумандаги бошқа бир Мактабгача таълим муассасасида молиявий назорат бошқармаси томонидан ўтказилган текширувда аниқланган камчиликларни ҳуқуқни муҳофаза қилувчи органларга юборилмаслиги ва жиноят иши қўзғатилмаслигини ҳал қилиб бериш эвазига МТМ мудираси Д.Б.дан 3 000 АҚШ долларини талаб қилиб олган вақтларида ашёвий далиллар билан ушланган.
Бундан ташқари, тезкор тадбир жараёнида мазкур шахсларнинг муқаддам содир этган яна бир жинояти фош этилди.
Аниқланишича, “Каттақўрғон ҳақиқати” газетаси муҳаррири Ш.Қ. 22.08.2019 йилда вилоятдаги МТМга келиб, аслида “Каттақўрғон ҳақиқати” газетаси муҳаррири бўлсада ўзини гўёки “Кun.uz” интернет сайти мухбири деб таништириб, уни алдаб ва ишончига кириб, муассасада текшириш ўтказиш ва камчиликларни аниқлаб интернетда чоп этиб, Д.Б.ни ишдан бўшатиш ҳамда жиноят иши қўзғатиш билан қўрқитиб, бу ишни амалга оширмаслиги учун жиноий шериги боғча мудираси Т.Э.нинг телефон рақамини бериб, унга учрашишини айтган.
Ўз навбатида Т.Э. мудира Д.Б.га “Кun.uz” сайтининг “мухбирлари” билан боғлиқ иши ҳал бўлиши учун 3 000 АҚШ доллари бериши лозимлигини айтиб, ундан 2900 АҚШ доллари ва тилла тақинчоғини олган.
Ҳозирда ушбу ҳолатлар юзасидан Каттақўрғон тумани боғча мудираси Т.Э. ва “Каттақўрғон ҳақиқати” газетаси муҳаррири ва “Жамият” ижтимоий-сиёсий газетасининг вилоят мухбири Ш.Қ.ларга нисбатан ЖКнинг 168-моддаси ва 28,211-моддалари билан жиноят иши қўзғатилиб, тергов ҳаракатлари ўтказилмоқда.