Туркиялик тадбиркор Ахмет Демир «Халқ сўзи» нашрига берган интервьюсида «Чорсу» меҳмонхонаси реконструкцияси нима учун оқсаётгани ҳақида гапириб, бу жараёнда Тошкент шаҳар ҳокимлиги ва бошқа мутасаддиларни айблаган эди.31 январь куни Tashkent City халқаро ишбилармонлик марказида ўтказилган матбуот анжуманида туркиялик тадбиркорнинг эътирозларига жавоб берилди, деб хабар берди «Дарё» нашри.
Хусусан, Ўзбекистон Иқтисодиёт ва саноат вазирининг биринчи ўринбосари Равшан Ғуломовнинг айтишича, Аҳмет Демир «Чорсу» меҳмонхонаси бўйича ўз инвестиция мажбуриятларини ҳамон бажармаган.2017 йилда
Demir Group компанияси 2017 йилнинг сентябрь ойида «Чорсу» меҳмонхонаси биносини камида 33 миллион доллар миқдорида инвестиция мажбуриятларини бажариш шарти билан нол харид қийматида сотиб олди.
«Мана Tashkent City. У қурилмоқда, лотлар бунёд этиляпти. Ундан ярим километр масофада жойлашган ‘Чорсу’ меҳмонхонасини олайлик. 20 йилдан бери қурилмоқда. Туркиялик тадбиркорга уни бепул берганмиз.
Тўрт юлдузли меҳмонхона ваъда қилишганди, катта ваъдалар берилган, 30 миллион хорижий инвестициялар айтилган. Натижани кўряпмиз. Ваъдани бажариш ўрнига, ўзбек банклари пул бермагани, шунинг учун муддатлар кечикаётгани ҳақида гапирмоқда. Бу ерда ўзбек банкларининг нима алоқаси бор? Инвестор мажбуриятларни ўз зиммасига олган», — дейди Равшан Ғуломов.
«Энг катта муаммо - қоғозбозлик. Бизга қўшимча ер керак, сабаби меҳмонхона камида тўрт юлдузли бўлиб, 350 та хонадан иборат бўлади. Хорижлик ҳамкорларимиз бундай йирик иншоотда намунали хизмат кўрсатиш учун 2 гектарлик майдон камлик қилишини айтишганди. Шундан сўнг биз Тошкент шаҳар ҳокимияти ва бошқа мутасаддиларга қўшимча ер майдони ажратиш бўйича мурожаат этгандик. Натижада яна 3 гектар ер қўшиб берилиши ваъда қилиниб, бу ҳақда давлат раҳбарининг қарори ҳам чиқди», — деган эди Ахмет Демир ўз интервьюсида.