Фарғона вилояти Ўзбекистон туманида сохта Мажбурий ижро бюроси ходими қўлга тушди. Бу ҳақда Мажбурий ижро бюроси Фарғона вилоят бошқармаси жамоатчилик билан алоқалар ва ҳуқуқий ахборот бўлими инспектори Жамолиддин Одилов маълум қилди.Хабарда айтилишича, Яйпан шаҳрида яшовчи А.А. Мажбурий ижро бюроси давлат инспектори учун махсус белгиланган хизмат кийимини тиктириб олади. У бу кийимда шаҳарнинг Бодомзор кўчасида яшовчи С.Т. нинг хонадонига келади. Ўзини Мажбурий ижро бюроси Ўзбекистон туман бўлими ходими, деб таништиради. Гап орасида “Электрон онлайн” савдолари орқали унга арзон нархда телевизор ва кир ювиш машинаси олиб беришини айтади. Шундай қилиб, сохта ходим С.Т.нинг 831 000 минг сўм нақд пулини олиб, воқеа жойини тарк этади.
С.Т. нинг аризаси асосида тўпланган ҳужжатлар юзасидан Ўзбекистон туман ИИБ ҳузуридаги тергов бўлинмаси томонидан А.А.га нисбатан Ўзбекистон Республикаси ЖК нинг 168-моддаси 1-қисми билан жиноят иши қўзғатилди. Ярашув тўғрисидаги қарор билан жиноят иши судга тақдим қилинди.
Тергов жараёнида А.А.дан Мажбурий ижро бюроси ёзувлари бўлган бир нечта хизмат кийими сифатида тикилган уст-бошлар ашёвий далил тариқасида олинган.