Навоийлик Элёр Бўриев намунали оиланинг фарзанди эди. Нима ҳам бўлдию тўрт тилни биладиган бу йигитча жиноят кўчасига кирди. Унга нисбатан Ўзбекистон Республикаси Жиноят кодексининг 246-моддаси 1-қисми билан жиноий иш очилди. Суд 3 йил муддатга озодликдан маҳрум этиш юзасидан қарор чиқарди.Ўзбекистон ёшлар иттифоқи Навоий вилояти кенгаши раисининг аралашуви, судда жамоат ҳимоячиси сифатидаги иштироки сабаб Бўриев суд залидан озод этилди.
Ёшлар иттифоқининг Навоий вилояти ва Навоий шаҳар Кенгаши томонидан унинг ҳаракатлари ўрганиб таҳлил қилиб чиқилди. Таҳлил натижалари Элёр Бўриевнинг ота-онаси иштирокида муҳокама қилиниб, уни Ёшлар кафиллигига олишга қарор қилинган.
Маълумот учун, Элёр Бўриев Тошкент давлат шарқшунослик институтини тамомлаган. Хитой Халқ Республикасининг “HENAN” университетига ҳужжат топшириб ўкишга кирган эди. Ушбу университетда 2016 йилнинг 10 сентябрдан 2017 йил 30 июнига қадар тахсил олиб, у ерни аъло баҳолар билан тугатган. Хитой, испан, рус, инглиз тилларини мукаммал билади.
“Мен авваламбор Президентимга ўз миннатдорчилигимни билдираман.Ўзимга, билимимга ишонаман, ваъда бераман келажакда юртимга нафи тегадиган етук кадр бўламан. Ўзбекистон ва Хитой халқи билан дипломатик алоқаларни ўрнатишга, юртимнинг тараққиётига муносиб ҳисса қўшаман”, дейди Бўриев.