Ставропол ўлкасида ИИВ генерал майори Александр Туривненко буюртма қотилликда гумон қилиниб, қўлга олинди. Бу ҳақда Россия Тергов қўмитаси маълум қилди.Қўмитага кўра, Кисловодск шаҳридаги санаторийлардан бирида директор бўлган Туривненко марҳум укасидан қолган меросга эга чиқиш учун унинг турмуш ўртоғини ўлдиришга қарор қилади.
Генерал бунинг учун танишига мурожаат қилади ва қотиллик учун 1 миллион рубл ваъда қилади. Таниши эса бу мурожаат ҳақида ҳуқуқ-тартибот идораларига хабар беради.
Шундан сўнг қотиллик саҳналаштирилиб, Туривненко ижрочидан гўёки ўлдирилган аёл фотосини олади. У «бажарилган» буюртма учун пулни бераётган чоғида ҳибсга олинди.
Маълумот учун, Россия ИИВ транспортдаги ички ишлар Ғарб бошқармаси бошлиғи бўлган генерал майори Александр Туривненко 2010 йили ўша пайтдаги президент Дмитрий Медведев томонидан истеъфога чиқарилганди.