Буюк Британия ҳукумати XVIII аср, шунингдек, Биринчи Жаҳон уруши давомида тўпланиб қолган давлат қарзларини қайтаришни режалаштирмоқда. Бу ҳақда 27 декабрь, шанба куни The New York Times газетаси
хабар берди.
Хусусан, расмий Лондон 1720 йилда олган қарз мажбуриятларини қоплаб бериш ниятида. Ўшанда муваффақиятсиз пул чайқовчилиги сабаб, Жанубий денгизлар савдо компанияси банкрот бўлган, инвестор сифатида иштирок этган минглаб британияликлар эса ўз бойликларидан маҳрум бўлишганди. Бунинг натижасида мамлакатда молиявий инқироз бошланиб, Буюк Британия халқаро кредиторларга мурожаат қилишга мажбур бўлганди.
Буюк Британия молия вазири Жорж Осборннинг маълум қилишича, 2015 йилда ҳукумат Биринчи Жаҳон уруши давридаги қарзларни тўлаб беради, шундан сўнг эса XIX ва XVIII асрларда кўрсатилган молиявий ёрдамлар бўйича ҳисоб-китоб қилади. Унинг сўзларига кўра, мамлакат ҳукумати тўпланиб қолган қарзларни паст фоиз ставкалари бўйича тўлашни режалаштирмоқда.
Буюк Британиянинг тарихий қарзи ҳажми, Deutsche Welle’нинг ёзишиа, 2,5 миллиард фунт-стерлингга тенг. Айни вақтда, Буюк Британиянинг умумий давлат қарзи ҳажми 1,4 триллион фунт-стерлингга етади.
Аввалроқ, Буюк Британия ҳукумати 1927 йили ўша вақтдаги молия вазири – Уинстон Черчилл томонидан чиқарилган облигациялар бўйича қарзнинг бир қисми қоплаб берилишини маълум қилганди. Ушбу қимматли қоғозлар Биринчи жаҳон уруши, шунингдек, Қрим уруши ва Наполеонга қарши кампаниялар вақтида олинган қарзларни қоплаш учун чиқарилганди. Буюк Британия молия вазирлигининг маълум қилишича, 2015 йил 1 февраль куни қарзнинг 218 миллион фунт-стерлинг қисми тўлаб берилади.
Манба:
Kun.uz