Toyota компанияси бутун дунё бўйлаб бир миллиондан ортиқ Prius ва C-HR русумли автомобилларини ёнғин чиқиш эҳтимоли сабабли қайтариб олмоқчи, деб ёзади Kun.uz хориж матбуотига таяниб.Компания раҳбарияти ушбу нуқсон 2016-2018 йилларда ишлаб чиқарилган Prius, Prius Prime ва C-HR русумидаги автомобилларда аниқланганини билдирган.
Автомобиллар бутун дунё бўйлаб қайтариб олинади. АҚШдан энг кўп – 192 минг дона машина қайтарилади. Қайд этилишича, барча машиналар бепул таъмирлаб берилади.
Toyota 2018 йилда ўз автомобилларини қайтариб олиши ҳақида биринчи марта эълон қилаётгани йўқ. Май ойида Россиядан 7,6 минг машина, жумладан Lexus автомобиллари хавфсизлик ёстиқчасидаги нуқсон сабабли қайтариб олинганди. Августда худди шу сабаб билан Россиядан яна 20 минг ва Хитойдан 181,8 минг дона машина қайтариб олиниши маълум қилинди.