Нью-Мексико штатидаги суратга олиш майдончасида тасвирчи аёлнинг ҳалок бўлишига олиб келган ўқ актёр Алек Болдуин томонидан тўппончадан узилган. Бу ҳақда Санта-Фе округи шерифининг баёнотида айтилди.Rust («Занг») вестернини суратга олиш ишлари Нью-Мексико штатида бўлиб ўтаётганди. Алек Болдуин фильм продюсери бўлган ҳамда унда бош ролни ижро этаётганди.
«Шериф идораси реквизит учун мўлжалланган қуролдан Алек Болдуин ўқ узганини тасдиқлайди», дейилади хабарда. Аввалроқ, ҳодиса ўқсиз патронларга эга тўппончадан ўқ узиш пайтида юз бергани ҳақида хабар берилган эди. Фильм режиссёри ўмров суягидан яраланган ва ҳозирда оғир аҳволда. 42 ёшли тасвирчи аёл Алина Хатчинс оғир жароҳат олди, у тиббий вертолётда Албукеркедаги касалхонага етказилди. Бироқ, шифокорлар унинг ҳаётини сақлаб қололмади.
Санта-Фе округи шериф идораси вакили Хуан Риоснинг айтишича, Болдуинга нисбатан ҳали айблов қўйилмаган.
Тўппончага қандай шароитда жанговар патронлар солингани, шунингдек, Болдуиннинг режиссёр ва операторга ўқ узишининг сабаблари ошкор қилинмаган.