Микаэль Секейра: "Локомотив" яна бир бор ўзининг яхши ўйинини намойиш этди. Афсус, ғалабани ушлаб қола олмадик"

Coca-Cola Суперлиганинг 14-туридан ўрин олган "Локомотив" - АГМК (1:1) учрашувидан сўнг мезбонлар бош мураббийи Микаэль Секейра матбуот анжуманида иштирок этди.

Ўйин ҳақида
- Жуда чиройли ўйин бўлди. "Локомотив" яна бир бор ўзининг яхши ўйинини намойиш этди. Афсус, ғалабани ушлаб қола олмадик. Лекин ўйин жараёнида тактик жиҳатдан жуда тўғри ўйин кўрсатдик деб ўйлайман. 

- Азизбек Амонов вазиятларни голга айлантира оладиган ҳужумчи. Тўғри у гол урди, лекин Абдухолиқов майдонга туширилгач жамоа ҳужуми кучайди. Шу ҳақида фикрингиз?
- Бу ҳам бир вариант, Азизбек Амонов ўз ишини тўғри бажармоқда. У чап томонда ҳам, ўнг томонда ҳам ўзини кўрсатиб келмоқда.

- Гол ўтказиб юборилган вазиятда ҳимоячилар ўйиндан ташқари вазиятга ишониб қолишдими?
- Эътибор берган бўлсангиз, байроқни кўтарганидан сўнг жамоамиз тўхтаб қолди. Агар кўтармаганида ўз ишини охиригача етказарди. Иккиланиш вазияти бўлиб қолди, хатога йўл қўйдик.

- Жамоа кўпроқ 3 марказий ҳимоячи услуби билан ўйнамоқда. Аутсайдер жамоаларга қарши ўйинда бу услуб панд бериб қолмасмикан?
- Йўқ, бу муаммоли вазият эмас. Биз ҳар бир ўйинга ҳар-хил услуб билан майдонга тушамиз. 

- Ён ҳакам байроқни гол бўлганидан кейин кўтарди. Футболчиларнинг тўхтаб қолиши бу профессионализм билан боғлиқми?
- Одатда байроқни кўтараётганда зарба йўлланганидан сўнг кўтариш керак. Кўпчиликнинг айтиши бўйича, байроқ зарбадан олдин кўтарилган ва шу сабаб футболчилар тўхтаб қолган.