Фото: Getty Images
Ушбу муаммо кўплаб аёлларга таниш, айниқса, ёз мавсумида бу янада кучаяди. Бунинг учун касал бўлиш ёки қандайдир ёш чегарасидан ўтиш шарт эмас. Ишдан кейин оёқларингиз оғрияптими? Бу борадаги тавсияларимизга амал қилинг.
Кечқурун оёқ оғриши: сабаб ва ечимлари
Нотўғри пойабзал
Баъзан оёқлар нотўғри пойабзалдан азият чекади, натижада улар жуда чарчайди ва кечқурун безовта қилади. Тор пойабзалда юрмасдан туриб ҳам товонга оғирлик тушади, бу кейинчалик оёқ бармоқлари деформациясига олиб келиши мумкин. Баланд пошнали пойабзал туфайли оёқда қадоқ пайдо бўлади ва яссиоёқлик каби патологиянинг ривожланиш хавфи ортади. Аммо фақатгина текис тагликдаги моделларни кийиш ҳам тавсия этилмайди.
Қандай қилиб тўғри пойабзал танлаш мумкин?
Пошна баландлиги 2-4 сантиметр бўлган, олд қисми кенг, товони мустаҳкам оёқ кийим энг яхши вариант ҳисобланади. Бундай пойабзалга физиологик стрессни камайтирадиган махсус ортопедик тагликларни танлашингиз мумкин. Бундай тагликларни ўзингиз билганингизча харид қилманг, бунинг учун ортопедга мурожаат қилинг. Оёқлар хусусиятларига асосланиб, шифокор индивидуал тагликларни тавсия қилади. Бундай тагликлари бўлган қулай пойабзалда оёқларингиз оғримайди.
Ҳаракатнинг камлиги
Кун бўйи офисда ўтириш оғриқ ва шишишни келтириб чиқаради. Агар кечқурун оёқлар шишиб оғриса, бу қон айланиши бузилганини билдиради. Қон томирларда пастдан юқорига қараб ҳаракатланади. Вена тизимининг клапанлари қон оқимининг йўналиши учун жавобгардир. Улар қоннинг юракка оқишини таъминлайди ва унинг тескари йўналишда ҳаракатланишига йўл қўймайди. Ушбу веноз клапанларнинг аксарияти пастки оёқда жойлашган. Биз ҳаракат қилсак, ундаги мушаклар қисқаради, қонни томирлардан сиқиб чиқаради ва унинг юракка чиқишини рағбатлантиради. Агар клапанлар етарлича ёпилмаса, қон оқими тескари ҳаракатланади, веноз тизимдаги босим кўтарилади, томирларнинг деворлари деформацияланади ва чўзилади. Натижада варикоз томирлари ривожлана бошлайди.
Нима қилиш керак?
Махсус трикотаж пайпоқ бундай муаммолардан қочишга ёрдам беради. У оёқнинг турли қисмларига керакли босимни беради, шунда ҳеч бир жойда қон ҳаракатига тўсқинлик бўлмайди ва тақсимланган сиқилиш таъсири туфайли унинг пастки қисмлардан юракка оқимини рағбатлантиради. Бундан ташқари, иш куни давомида енгил машқ қилиш учун вақт топишга ҳаракат қилинг: тортишиш машқлари, ҳеч бўлмаганда офис атрофида кичик сайр. Қон юришини рағбатлантириш учун тез-тез оёқларни кўтариб ўтиринг. Ишдан кейин контраст душ қабул қилинг: бундай душ қон айланишини яхшилайди ва ҳужайраларнинг кислород билан тўйинишига ёрдам беради.
Кучли босим
Жуда фаол спорт турлари, масалан, югуриш, доимий тик туриш билан боғлиқ ишлар туфайли кечга бориб оёқлар чарчайди, товонларда оғриқ пайдо бўлади. Бир ҳолатда туриш туфайли оёқлардаги қон айланиш ёмонлашади, чунки қон томирлар тортишиш кучини енгиб, пастдан юқорига қараб ҳаракатланади. Бундай турмуш тарзи варикоз томирларининг ривожланишига олиб келиши мумкин.
Қандай олдини олиш керак?
Оёқларда стресс кучайган ҳолларда махсус пайпоқни ортопедик тагликлар билан биргаликда кийиш тавсия этилади. Бу нохуш аломатларни йўқотишга ёрдам беради. Танангизни жуда оғир жисмоний иш билан ҳаддан ташқари қийнаманг.
Жисмоний ҳолатнинг ёмонлиги
Оёқлар жисмонан заиф бўлиши мумкин. Мушак ва пайлар доимо чиниқтирилиши керак, акс ҳолда юриш ёки югуриш чарчоқни келтириб чиқаради. Агар мушаклар заиф бўлса, бу оёқларнинг амортизатор функциясига таъсир қилиши мумкин, натижада яссиоёқлик пайдо бўлади.
Қандай шуғулланиш керак?
Бундай ҳолларда оддий машқлар ҳам ёрдам беради: оёқ учи ва товонда, оёқнинг ички ва ташқи томонларида навбатма-навбат юриш, оёқ мушаклари массажи самара беради. Бундай классик машқлар мушаклар фаолиятини рағбатлантиради, пай ва бўғимларни кучайтиради.
Олдини олиш ҳар доим даволашдан яхшироқ. Фитнес-залда мунтазам равишда оптимал жисмоний машқлар қилиш бутун танага фойдали таъсир кўрсатади. Жисмоний машқлар дастурини тўғри ишлаб чиқиш учун мураббий билан маслаҳатлашган маъқул.