Президент ушбу ҳафта Тожикистонга расмий ташриф билан боради. Бу ҳақда Президент матбуот котиби Шерзод Асадов 7 июнь куни ўтказилган брифингда маълум қилди.
«Ўзбекистон Президенти 10−11 июнь кунлари Тожикистонга расмий ташриф билан боради. Асосий музокаралар ташрифнинг биринчи куни Душанбе шаҳрида бўлиб ўтади. Ташрифнинг иккинчи кунида Хўжанд шаҳрида қатор тадбирлар режалаштирилган», — дейди Асадов.
Шерзод Асадовнинг сўзларига кўра, давлат раҳбари 7 июнь куни барқарор ривожланиш мақсадларини молиялаштириш дастури юзасидан тақдимотда қатнашади. 8 июнь куни эса чорвачиликни ривожлантириш ҳамда озуқа базасини кўпайтириш масалалари бўйича видеоселектор йиғилишини ўтказиш режада бор.
Эслатиб ўтамиз, Шавкат Мирзиёев давлат ташрифи билан Тожикистонга 2018 йил март ойида, сўнг 2018 йилнинг сентябрь ойи охирида борганди. Кейинчалик, 2019 йил 14 июнида Осиёда ўзаро ҳамкорлик ва ишонч чоралари бўйича конференциянинг бешинчи саммитида иштирок этиш учун Тожикистонга борган.