2021 йил 1 сентябрга қадар Ўзбекистоннинг йирик шаҳарлари, вилоят ва туман марказларида савдо ва кўнгилочар кўчалар ташкил этилади. Савдо ва кўнгилочар кўчаларда барча тадбиркорлик субъектларига 24 соат мобайнида тун-у кун фаолият юритиш ҳуқуқи берилади. Бу ҳақда Президентнинг «Хизматлар соҳасини жадал ривожлантириш чора-тадбирлари тўғрисида»ги қарорида сўз боради.
Тикланиш ва тараққиёт жамғармасидан хизматлар соҳасини ривожлантириш учун тижорат банкларига 300 миллион АҚШ доллари эквивалентида кредит линияси очилади. «Ўзмиллийбанк» 2021 йил якунига қадар халқаро молия институтларининг 200 миллион доллар миқдоридаги маблағларини жалб қилади.
Шунингдек, 2021—2023 йиллар давомида туман (шаҳар)ларда 15 та деҳқон бозори ва 115 та савдо комплекслари барпо этилади. Янги ташкил этиладиган деҳқон бозорлари ва савдо комплекслари устав капиталида маҳаллий давлат ҳокимияти органларининг мажбурий иштироки бекор қилинади.
Бундан ташқари, 10 та йўл-патруль хизмати ва божхона постидаги ерлар енгил турдаги савдо ва хизмат кўрсатиш субъектларини жойлаштириш учун тадбиркорларга 3 йилга ижарага берилади. Бу нуқталар асосан ҳайдовчиларга хизмат кўрсатади.
Савдо ва кўнгилочар кўчаларда:
- кўчма савдо объектлари учун жойлар тадбиркорлик субъектларига электрон онлайн-аукцион асосида сотилади;
- барча тадбиркорлик субъектларига жамоат хавфсизлиги қоидаларига қатъий риоя қилган ҳолда 24 соат мобайнида тун-у кун фаолият юритиш ҳуқуқи берилади.
Эслатиб ўтамиз, 2019 йилнинг июлида «Тунги вақтда фаолият юритувчи умумий овқатланиш корхоналари ва кўнгилочар объектларда жамоат хавфсизлигини таъминлашга доир қўшимча чора-тадбирлар тўғриси»даги ҳукумат қарори қабул қилинган. Унга кўра, Ўзбекистонда белгиланган талабларни бажарган кафеларнинг тун-у кун ишлашига рухсат берилган.