Иссиқхоналар қарздорлик эвазига банк ҳисобига ўтказиб берилди

Қарши туманлараро Иқтисодий судининг 14.03.2019 йилдаги ижро ҳужжатига асосан, қарздор “Humo-nur ta’minot” МЧЖ ҳамда қўшимча жавобгар «Яккабоғ тош-агро» МЧЖдан ундирувчи АТБ «Асабанк» Қашқадарё вилоят филиали фойдасига муддати ўтган кредит қарздорликлари, фоизи ҳамда бошқа умумий ҳисобда 1 млрд. 300 млн. сўм қарздорликни ундириш белгиланган.

Шунингдек, ундирувни ипотека шартномасига асосан қўшимча жавобгар «Яккабоғ тош-агро» МЧЖга тегишли бўлган 2 та иссиқхона биносига қаратилиши белгилаган.

Ушбу ижро ҳужжати юзасидан Мажбурий ижро бюроси Яккабоғ туман бўлими томонидан тумандаги Жийда МФЙ ҳудудида жойлашган иссиқхоналар тегишли тартибда хатланди. 2020 йил 3 декабрда мол-мулкни электрон онлайн-аукционда сотиш учун давлат ижрочиси томонидан қарор қабул қилинди.

Ташкил қилинган савдолар давомида иссиқхоналар сотилмаганлиги туфайли “Суд ҳужжатлари ва бошқа органлар ҳужжатларини ижро этиш тўғрисида”ги Қонунининг 56-моддасига асосан иссиқхона ундирувчига таклиф қилинди.

АТБ «Асабанк» Қашқадарё вилоят филиали берилган таклифни қабул қилиб, иссиқхоналарни ўз балансига олди. Шу сабабли, ижро ҳужжати ижроси амалда тамомланди.