Rezvani компанияси олти ғилдиракка эга дунёдаги энг кучли пикапни намойиш этди

^{Фото: Instagram / Rezvanimotors}
Калифорниянинг Rezvani бренди ўзининг Instagram саҳифаси орқали Hercules 6х6 моделининг янги тасвирлари билан бўлишди. Компаниянинг маълум қилишича, янги модель «сайёрадаги энг кучли олти ғилдиракли пикап»га айланади ва Hercules 6х6’ни «пикаплар худоси» деб аташмоқда, деб хабар беради Motor.

Hercules 6х6’га оид дастлабки маълумотлар шу йилнинг ёзида пайдо бўлган. Ўшанда унинг базавий мотори 289 от кучи ва 252 Нм айланувчи моментга эга 3,6 литрли V6 атмосфера двигатели ташкил этиши айтилганди. Муқобил сифатида 507 от кучига (583 Нм) эга 6,4 литрли V8, топ версияга эса 1014 от кучига эга 6,2 литрли V8 турбомотори таклиф этилмоқда.

Ҳозирча дунёдаги энг кучли пикап Ram 1500 ТRХ бўлиб, унга 712 от кучи ва 881 Нм айланувчи моментни тақдим этишга қодир 6,2 литрли V8 двигатели ўрнатилган.

Hercules 6х6 Rezvani’нинг бошқа модели — Таnk йўлтанламаси каби зирҳланган версияга эга бўлади. Шунингдек, пикап Таnk’нинг дизайни ва Falken Wildpeak йўлтанламас резинаси билан жиҳозланади.

^{Фото: Instagram / Rezvanimotors}
Дастлабки маълумотларга кўра, Hercules 6х6 моделининг нархи 300 минг доллардан қимматроқ бўлади. Автомобиль ишлаб чиқарувчи ҳозирда буюртмаларни қабул қилишни бошлаган — бунинг учун 266 доллар депозитга қўйиш лозим.

Эслатиб ўтамиз, шу йилнинг июнь ойида Америкадаги Specialty Vehicle Engineering (SVE) компанияси янги Syclone пикапининг версиясини тақдим этганди. Дунёдаги энг тезкор ўрта ўлчамли пикап дея эътироф этилган моделга 760 от кучига эга V8 компрессори ўрнатилган.