Кадр: Telegram/ЙҲХББХоразм вилоятида спиртли ичимлик ичиб автомашина ҳайдагани учун ҳайдовчилик ҳуқуқидан маҳрум қилинган ҳайдовчи яна маст ҳолатда машина ҳайдаб қўлга тушди, дея хабар бермоқда ЙҲХББ.
Маълум қилинишича, Хоразм вилояти ЙҲХБ инспекторлари томонидан автомашина бошқариб келаётган ҳайдовчи маст эканлиги аниқланган. Ҳайдовчи жавобгарликдан қочиш учун сувга тушиб олган.
Ҳайдовчи аввал ҳам спиртли ичимлик ичиб автотранспорт ҳайдагани сабабли 2020 йил 20 август куни ҳайдовчилик ҳуқуқидан 2 йилга маҳрум қилингани аниқланган.
Жавобгарликдан қутулиш учун қилган ҳаракатлари иш бермаган ҳайдовчи сувдан чиққан ва инспекторларга ўз шартларини қўйган. Бу ҳам наф бермагач, ҳайдовчи ўзини яна сувга ташлаган. Ҳайдовчи ушланиб белгиланган тартибда экспертизадан ўтказилган ва спиртли ичимлик ичгани аниқланган.
Ҳайдовчига нисбатан белгиланган тартибда маъмурий баённома расмийлаштирилди. Автомашина вақтинчалик ушлаб туриш учун жарима майдонига юборилди.
Кадр: Telegram/ЙҲХББ
Вилоят ЙҲХБ томонидан шунга ўхшаш яна бир ҳолат аниқланган. Қайд этилишича, Lacetti автомашинаси ҳайдовчини чап томонга бурила олмай ариққа тушиб кетган. Ҳайдовчи маст ҳолатда автомобиль бошқаргани аниқланган.
Яна бир ҳолатда Damas ҳайдовчиси ЙҲХ инспектори тўхтатишига қарамай бошқарувни давом эттирган. Ҳайдовчи дуч келган хонадон яқинига машинани тўхтатиб ўзи супанинг тагига яширинган.
Кадр: Telegram/ЙҲХББ
ЙҲХБ ходимлари ҳайдовчи шахсини аниқлаш мақсадида туман ИИБ идорасига олиб борган. Ҳайдовчи спиртли ичимлик ичганини тан олишдан қочиб, ўзини бошқа ном билан таништирган.
Экспертиза натижасида ҳайдовчи спиртли ичимлик ичганига аниқлик киритилган. Ҳайдовчига нисбатан белгиланган тартибда маъмурий баённома расмийлаштирилган. Автомашина жарима майдончасига жойлаштирилган.