Самарқанд вилояти Жомбой туман ИИБга 1992 йилда туғилган А. ариза билан мурожаат қилган, деб хабар бермоқда вилоят ИИБ ахборот хизмати.У 2020 йил 17 сентябрь кунидан 18 сентябрь кунига ўтар кечаси номаълум шахс Жомбой туманида жойлашган автомобилларга ёқилғи қуйиш шохобчаси офисининг иккинчи қавати эшигининг очиқлигидан фойдаланиб, у ерга ғайриқонуний равишда кириб, хонада бўлган темир сейфни калит танлаш йўли билан очиб, сейф ичида бўлган 320 000 000 сўм пулларини яширин равишда ўғирлаб кетганлигини маълум қилган.
Жомбой туман ИИБ ходимлари томонидан олиб борилган тезкор-қидирув тадбирлари натижасида мазкур ўғрилик жиноятини Ургут тумани Чумчуқли МФЙда яшовчи, 1995 йилда туғилган Ж. ва Ургут тумани Терак МФЙда яшовчи, 1998 йилда туғилган Х. содир этганлиги аниқланиб, улардан 84 500 000 сўм пуллар ашёвий далил сифатида ҳужжатлаштириб олинган.
Мазкур ҳолат юзасидан Жомбой туман ИИБ ҳузуридаги Тергов бўлими томонидан Жиноят кодексининг 169-моддаси 4-қисми “а” банди билан жиноят иши қўзғатилиб, тергов ҳаракатлари олиб борилмоқда.