Фото: Daryo.uzРеспублика махсус комиссиясининг қарорига кўра, 15 августдан бошлаб Ўзбекистонда нодавлат мактабгача таълим ташкилотлари ва мактаблар, шунингдек, ўқув курслари ва марказлари фаолиятини қайта йўлга қўйишга рухсат берилади.
Қарорда мазкур муассасалар фаолиятини қайта йўлга қўйиш учун зарур бўлган талаблар белгиланди.
Таълим марказлари ва тўгаракларда машғулотлар вақти олдиндан келишиб олиниши керак.
Ходимлар ва болалар (тарбияланувчилар)нинг соғлиғи ҳолатини доимий назорат қилиш (тана ҳароратини мунтазам ўлчаб бориш) зарур. Тана ҳарорати 37 даража ва ундан юқори бўлган ёки инфекция аломатлари мавжуд бўлган ходимлар ва болалар (тарбияланувчилар) машғулотлардан четлатилади.
Ходимлар тиббий ниқоб ва тиббий қўлқоплардан фойдаланиши ва ижтимоий масофани сақлаши лозим.
Муассасаларда санитария-гигиена ва дезинфекция талабларига қатъий риоя этиш, бино хоналарини доимий равишда дезинфекция қилиш, уларга кириш-чиқиш жойларини пирометрлар, антисептик воситалар ва дезинфекцион «тўшак»лар билан жиҳозлаш чоралари кўрилиши керак.
Эслатиб ўтамиз, Республика махсус комиссиясининг қарори билан 2020 йил 10 июлдан бошлаб ташкилий-ҳуқуқий ва мулкчилик шаклидан қатъи назар мактабгача таълим ташкилотлари, ўқув курслари ва ҳар қандай тўгараклар фаолияти тўхтатилганди.