Фото: ReutersTesla ва SpaceX компаниялари асосчиси Илон Маскнинг онаси Мэй хоним миллиардер ўғлининг ёшлиги анча қийинчиликда ўтгани ҳақида сўзлаб берди.
1979 йилда эри билан ажрашганидан сўнг Мэй Маск моддий жиҳатдан қийналиб қолган ва оила тирикчилик учун энг зарур нарсалардан ҳам иқтисод қилишга мажбур бўлган. Tesla компаниясининг бўлажак асосчиси Илон, унинг укаси Кимбал ва синглиси Тоска эски либослар дўконидан (секонд-хенд) харид қилинган кийимларни кийишга ҳамда энг арзон егуликларни ейишга мажбур бўлишган.
«Болаларим ерёнғоқ мойида тайёрланган бутербродни ҳамда ловияларни хуш кўришарди. Бу анча арзонга тушарди. Яна мен гуруч ва нондан оддийгина егуликлар тайёрлаб берардим ва бу таомлар арзонлиги билан бирга фойдали ҳам эди», — деган Мэй Маск.
Масклар оиласи кинотеатр, ресторан ва сартарошхоналарга боришмаган. Бунинг ўрнига она болаларининг сочларини ўзи тарошлаб қўйган. Турар-жой ва тирикчилик учун она диетолог сифатида ишлаб қилиб пул топган.
«Биз яшашга интилдик ва фарзандларим мен билан бирга курашди», — дея сўзларини ниҳоялаган Мэй Маск.
Илон Маск 1971 йилда Жанубий Африка Республикасининг Претория шаҳрида, шу ерлик муҳандис-учувчи ва канадалик диетолог аёл оиласида туғилган. Бўлажак миллионер ўсмирлик пайтидаёқ АҚШга кўчиб кетишга қарор қилади. Қўшма Штатларга Канада орқали бориш осонроқлигини тушунган йигит онасининг канадалик эканидан фойдаланган ҳолда Канада паспортини олади ва отасининг қаршилигига қарамай, 18 ёшга тўлиш арафасида – 1989 йилда Кингстондаги Қиролича университетига ўқишга жўнаб кетади. Орадан уч йил ўтиб, у АҚШда, Пенсилвания университетига ўқишга киради.
Илон Маск айни пайтда миллиардерлар ўнлигига киради: унинг бойлиги 70,5 млрд долларга баҳоланади.
Унинг бир ёшга кичик укаси Кимбал ҳам бизнес билан шуғулланади — у The Kitchen ресторанлар тармоғи соҳиби.