Фото: Daily MailХитойнинг Чунцин шаҳрида яшовчи эркакнинг жасади кремация қилиниб, тупроққа қўйилганидан сўнг уйига тирик ва соғлом ҳолда қайтиб келди, деб ёзади Daily Mail.
Дафн этилганидан икки ой ўтиб қайтиб келган эркак қариндошларини шок ҳолатига туширди.
Руҳий касал Цзяо фамилияли 43 ёшли эркак март ойида йўқолиб қолган эди. Қариндошлари унинг йўқолгани ҳақида полицияга хабар берган.
Бир ойдан сўнг эркакнинг Чжэцзян провинцияси Вэньчжоу шаҳри касалхонасида эканлиги айтилди.
Қариндошлари касалхонага етиб келганида шифокорлар эркак туберкулёзга чалингани ҳамда унинг аҳволи оғир эканлигини айтди.
Бемор кислород ниқобида ётгани учун қариндошлари унинг юзини кўра олмади. Оила эркакни уйга олиб боришга қарор қилди, бироқ у йўлда вафот этди.
Оила аъзоларига марҳум билан хайрлашишга рухсат берилмади. Коронавирус туфайли жорий этилган чекловларга кўра, унинг жасади зудлик билан кремация қилинди. Оила дафн маросими учун катта пул — 140 минг юань тўлади.
Дафн маросимидан бир ой ўтиб марҳумнинг амакисига Цзянси провинцияси полициясидан қўнғироқ бўлган. Унга ўзини Цзяо деб таништирган уйсиз эркак топилганини айтишган. Шундай қилиб, эркак соғ-омон уйга қайтган.
Эркак қандай қилиб бошқа провинцияга бориб қолганини руҳий касаллиги туфайли тушунтира олмаган.
Шунингдек, касалхонада вафот этган эркак кимлиги ҳам номаълум. Касалхона маъмурияти вафот этган эркакнинг исми Цзяо бўлгани ҳамда у иккинчи Цзяога ўхшашини айтган. Омон қолган Цзяонинг қариндошлари касалхонадан товон пули талаб қилмоқда.
Манба: Daryo.uz