Фото: PixabayЯпониянинг Миёси шаҳрида яшовчи Ёсито Харада исмли эркак аёлларга тегишли машиналар шинасини тешиб юрган. У шу йўсинда аёллар билан танишмоқчи бўлган. Бу ҳақда South China Morning Post хабар берди.
32 ёшли Харада Хигасиура шаҳрида полицияга 43 ёшли аёл шикоят қилганидан сўнг қўлга олинган.
Япониялик аёл супермаркетдан чиққанидан сўнг машинаси шинасининг ҳаво қўйиб юборганини кўрган. Шу пайт унинг ёнига нотаниш киши келган ҳамда ёрдам беришини айтган.
Ҳайдовчи аёл бундай ҳолат ўзи билан бир йил аввал ҳам содир бўлганини эслаган. У эркакнинг юзини эслай олмаган, бироқ ушбу ҳолат унга шубҳали туйилиб, полицияга қўғироқ қилишга қарор қилган.
Ҳуқуқ-тартибот органлари ходимлари супермаркет автотураргоҳига ўрнатилган кузатув камераларини текшириб, аслида машина шинасини ёрдам таклиф этган эркак тешганини аниқлаган.
Ёсито Харада полицияга ўзига ёқиб қолган аёл билан шу тариқа танишмоқчи бўлгани ҳақида сўзлаб берган.
Қайд этилишича, етти йил аввал ҳам худди шундай исм-фамилияли эркак айнан шу ҳаракати учун қўлга олинган.
Ўша пайтда ҳам айбланувчининг адвокати ҳимоясидаги шахс аёллар билан танишиш учун бу ишни қилганини айтган.
Ҳар иккала ҳолатда ҳам бир инсон ҳақида гап кетаётганига аниқлик киритилмаган.
Манба: Daryo.uz