Фото: EPAЕвропа комиссияси 3 июль куни коронавирусни даволаш учун ремдесивир дори воситасидан фойдаланишга рухсат берди. Бу ҳақда Еврокомиссия аъзоси Стелла Кириакидис маълум қилди, деб ёзмоқда «Интерфакс».
«Европа Иттифоқида коронавирусни даволовчи биринчи дорининг ишлатилишига рухсат берилиши вирусга қарши курашда муҳим қадам ҳисобланади», — дейилади Кириакидиснинг баёнотида.
Комиссарнинг қўшимча қилишича, доридан фойдаланишга рухсат ариза берилганидан кейин бир ойда берилган ва бу Европа Иттифоқининг даволашнинг янги усуллари пайдо бўлишига тез реакция билдириш бўйича қатъийлигини кўрсатади.
Мазкур доридан фойдаланишга рухсатнинг берилиши Европа дори воситалари агентлиги пневмония ташхиси қўйилган ва коронавирус аниқланган 12 ёшдан катта беморларни даволаш мақсадида мазкур препарат савдоси учун шартли рухсат берганидан кейин амалга ошди.
Препаратнинг самарадорлигини баҳолаш АҚШнинг аллергия ва юқумли касалликлар миллий институти томонидан амалга оширилаётган тадқиқотнинг натижаларига асосланган.
Институт томонидан 10 та мамлакатда 1000 дан ортиқ бемор иштирокида ўтказилган тадқиқотнинг натижасига кўра, беморларга вена орқали жўнатиладиган ремдесивир касалхонада ётқизилган беморларнинг тузалишини тезлаштирган. Препарат беморнинг касалхонада ётиш муддатини 15 кундан 11 кунгача камайтиради.
АҚШда май ойининг бошида коронавирус билан касалланган беморларни касалхоналарда даволаш учун ремдесивирдан фойдаланишга рухсат берилган, шундан сўнг Япония ва Жанубий Кореяда доридан фойдаланиш маъқулланган.
Мазкур препарат коронавирус кўпайишини блоклаш хусусиятига эга эканлиги канадалик олимлар томонидан апрель ойида аниқланганди.