NASA’да салкам етти йил ишлаган Марк Робер ҳозирда турли ақл бовар қилмас механизмларни йиғиб, кўнгилхушлик қилмоқда. Бу сафар Робер олмахонлар устида тажриба ўтказишга қарор қилди, деб хабар беради Meduza.Карантин вақтида Робер ўзининг ҳовлисига қушларнинг озиқланиши учун охур (кормушка) ўрнатган. Бироқ бу борада муаммо юзага келган: олмахонлар бошқаларнинг овқатини ўғирлаб, қушларнинг оч қолишига сабабчи бўлган. Блогер бу каби ҳолат давом этишига йўл қўймай, егулик учун меҳнат қилиш керак деб ҳисоблаган ва олмахонлар учун тўсиқлар йўлагини тайёрлаган.
Ҳайвонлар ёнғоқларга етиб боргунига қадар арқон йўл ва лабиринтдан ўтиши, айланаётган механизмларда югуриши, платформадан платформага сакраши, ковбой кўринишидаги камера қаршисида расмга тушиши керак бўлган. Охир-оқибат барча тўсиқларни босиб ўтган олмахонлар егуликни қўлга киритиши мумкин. Робернинг сўзларига кўра, тажриба вақтида ҳеч кимга жароҳат етмаган.
Робер олмахонларнинг тиришқоқлиги учун уларни озиқлантириш мақсадида алоҳида мини-стол ўрнатган.