Ўзбекистонда 23 май ҳолатига кўра, коронавирусга чалинган беморлар даволаниб чиқиши учун 109 миллиард сўмдан ортиқ пул сарфланган. Шунингдек, карантинга жойлаштирилганлар учун 100 миллиард сўмдан ортиқ харажат қилинган. Бу ҳақда Санитария-эпидемиология назорати давлат инспекцияси бошлиғи Нурмат Отабеков 25 май куни ўтказилган брифингда маълум қилди.Қайд этилишича, 23 май ҳолатига кўра, Ўзбекистонда 2492 нафар бемор даволаниб чиққан. Ҳар бир даволаниб чиққан бемор учун давлат 32,3 миллион сўмдан харажат қилган. Жами 80 миллиард сўмдан ошиқ маблағ шу мақсадга йўналтирилган.
Даволанаётганлар учун (23 май ҳолатига кўра 573 бемор) 18 миллиард сўмдан ошиқ маблағ сарфланди. Ҳар бир бемор учун 32,3 миллион сўмдан тўғри келган.
Ҳолати ўта оғир бўлган беморлар сони 50 нафарни ташкил қилган бўлиб, уларнинг ҳар бирига 64,4 миллион сўмдан, жами 3,2 миллиард сўм сарфланган.
Реаблитацияга ўтказилган 2492 бемор учун яна (2,8 миллион сўмдан) 6 миллиард 977 миллион сўм маблағ ажратилган.
Шунингдек, ҳозирда 45 455 киши карантинда ва уларнинг ҳар бири учун 2,2 миллион сўмдан ажратилган бўлиб, жами 100 миллиард сўмдан ортиқ маблағни ташкил этади.
Ўзбекистонда 25 май соат 16:30 ҳолатига кўра, коронавирус инфекцияси қайд этилганлар сони 3189 нафарга етди. Касалликдан тузалганлар сони эса 2607 нафарни ташкил этмоқда.
Манба: Daryo.uz