Черногорияда коронавирусга чалинган барча беморлар тўлиқ соғайишга муваффақ бўлди. Шундай қилиб, Черногория пандемияни енгган Европадаги биринчи давлатга айланди. Бу ҳақда мамлакат президенти Мило Жуканович ўзининг Twitter’даги саҳифаси орқали маълум қилди.Жукановичнинг таъкидлашича, Подгорицадаги Жамоат саломатлиги институти 20 кундан бери касалликка чалиниш бўйича бирорта янги ҳолатни қайд этмаган.
«Касаллар сони ноль! Давлат органлари ва бутун жамият ушбу муаммони ҳал этиш борасида юқори даражадаги масъулиятни намойиш этди, соғлиқни сақлаш тизимимиз эса тўғри ташкил этилгани, ўз ишига содиқ ва лойиқ эканлигини кўрсатди», — дейди президент.
Унинг қўшимча қилишича, эндиликда мамлакат пандемиянинг иқтисодий оқибатларга қарши курашни давом эттириши керак.
Эслатиб ўтамиз, Черногорияда коронавирусга чалиниш бўйича илк ҳолат 17 март куни аниқланганди. Бутун мамлакат бўйлаб 324 киши коронавирусга чалинган ва тўққиз киши COVID-19 оқибатида вафот этган.
Манба: Daryo.uz