АҚШда 27 йил олдин ўғирланган мотоцикл ўз эгасига қайтарилди

^{Фото: Motor}
Жонатан Хагински 17 ёшида 1990 йилда ишлаб чиқарилган мотоциклни сотиб олган. Бироқ у ушбу мотоциклдан узоқ баҳраманд бўла олмаган: орадан бир ой ўтгач йигитча аварияга учраган ва синган билаги билан шифохонага жўнатилган. Авария жойида қаровсиз қолиб кетган Kawasaki КХ номаълум кимса томонидан ўғирлаб кетилган, деб хабар беради Motor.

Шифохонадан чиққан Хагински зудлик билан мотоцикли ўғирлангани тўғрисида ариза ёзган, бироқ қидирувлар ҳеч қандай натижа бермаган.
Орадан 27 йил ўтгач, ўғирланган мотоцикл топилди. NBC телеканали маълумотларига кўра, Коннектикут штати ҳуқуқ-тартибот идоралари ходимлари 2019 йилнинг ёзида ўтказилган рейдлар вақтида бир неча ўнлаб квадроцикл ва мотоциклларни мусодара қилган.

Уларни утилизацияга юборишдан олдин, полициячилар мотоцикллар қидирувда бўлган ёки бўлмаганини текшириб кўрган. Маълум бўлишича, Kawasaki КХ қарийб 30 йил олдин ўғирлаб кетилган.
Ҳозирда мотоцикл ўзининг 44 ёшли хўжайинига қайтарилган. Маълумот учун, Хагински мототехникаларни таъмирлаш устахонасига эгалик қилади.