Фото: «ТАСС»Жаҳон соғлиқни сақлаш ташкилотининг (ЖССТ) Россиядаги вакили Мелита Вуйновичнинг маълум қилишича, коронавирусга антитананинг мавжудлиги одам у билан яна касалланмаслигини кафолатламайди. «ТАСС»нинг ёзишича, у тадқиқот натижаларини кутишга ундаган.
Унга кўра, коронавирус мутацияланмаса ҳам антитаналар организмни инфекциядан ҳимоя қилолмаслиги мумкин.
Мелита Вуйновичнинг сўзларига кўра, Россияда коронавирус бўйича кўплаб тадқиқотлар ўтказилмоқда. «Бу вирус ҳақида билимга эга бўлиш, нима ва қандай содир бўлаётганини тушуниш жуда муҳим», — деган у
Жаҳон соғлиқни сақлаш ташкилоти коронавирусдан тузалган одамлар қайта касалланишдан ҳимояланганликларини исботловчи далиллар йўқлиги ҳақида аввал ҳам огоҳлантирганди. «Тўлиқ тузалиш ва касалликнинг қайталаниши борасидаги саволларга ҳозир аниқ жавобимиз йўқ. Бу номаълум», — деганди ЖССТнинг фавқулодда вазиятлар бўйича ижрочи директори Майкл Райан.
Аввалроқ Хитойлик олимлар коронавирус мавсумий касалликка айланишини маълум қилганди. Уларнинг фикрича, бу инсоният билан узоқ вақтдан бери яшаб келаётган касалликлар каби мавсумий эпидемияга айланиши мумкин.
Шунингдек, хитойлик олимлар коронавирусдан кўпроқ эркаклар вафот этаётганини аниқлаган бўлса, ҳиндистонлик шифокорлар COVID-19’нинг 10 та мутациясини аниқлагани ҳақида хабар берилганди. Шунингдек, олимларнинг таъкидлашича, коронавирус инсон умрини 10 йилга қисқартириши мумкин.