Фото: whiov.cas.cnХитойнинг Ухань шаҳрида коронавирус билан касалланган биринчи одам лаборатория ходими бўлиб, у вирусни кўршапалакдан юқтирган, деб хабар бермоқда Американинг Fox News телеканали.
«Биз COVID-2019 билан дастлабки касалланган бемор Ухандаги илмий лаборатория ходими эканлигини аниқладик. У вирусни кўршапалакдан юқтирган. Кейинчалик айнан шу шахс бутун дунё бўйлаб одамлар ўлимига сабаб бўлаётган инфекция ташувчиси бўлган», — дейилади телеканалнинг 15 апрель куни намойиш этилган эфирида. Бироқ ходим вирусни қандай юқтириб олганига аниқлик киритилмаган.
Манбанинг таъкидлашича, ушбу лабораториянинг мақсади биологик қурол яратиш эмас, балки Хитойнинг вирусни аниқлаш ва унга қарши курашиш чоралари АҚШники билан тенг ёки ундан устун эканлигини кўрсатиш бўлган.
Шунингдек, вирус тарқалиши манбаси деб тахмин қилиб келинаётган Ухандаги денгиз маҳсулотлари сотиладиган бозорда эса ҳеч қачон кўршапалаклар сотилмагани айтилмоқда.
Аввалроқ, Хитой Ташқи ишлар вакили Чжао Лицзянь коронавирусни Уханга америкалик ҳарбийлар олиб келган бўлиши мумкин деган фикрни билдирган эди. У бу тахминни АҚШ касалликларни олдини олиш маркази раҳбари Роберт Редфильд Вакиллар палатасида сўзлаган нутқига асосланиб айтганди. Роберт Редфильд ўз нутқида гриппдан вафот этган бир неча америкаликларнинг жасадлари текширилганда уларнинг танасида коронавирус топилганини айтган.
Трамп Хитойнинг коронавирус АҚШ ҳарбийлари томонидан тарқалгани тўғрисидаги тахминини ёлғон деб атаган. Шунингдек, Хитойда коронавирус билан касалланиш бўйича дастлабки ҳолат декабрь ойида эмас, 17 ноябрда аниқлангани маълум бўлган.
Пентагон COVID-19 коронавируси лаборатория шароитида эмас, табиий усулда келиб чиққан деб ҳисобламоқда, аммо разведкада бу борада якуний хулосалар йўқ эди. АҚШ давлат котиби Майк Помпео келажакда коронавирус пандемиясининг айбдорлари топилиши кераклигини ва Хитой ушбу касаллик ҳақида вақтида хабар бермаганини айтганди.
Эслатиб ўтамиз, COVID-19 коронавирус инфекцияси дастлаб Хитойнинг Ухань шаҳрида қайд этилганди. Жорий йилнинг 11 март куни Жаҳон соғлиқни сақлаш ташкилоти коронавирусни пандемия деб эълон қилганди.
Жонс Ҳопкинс маълумотларига кўра, айни пайтда дунё бўйича коронавирусга чалинганлар сони 2 миллион кишидан, вафот этганлар сони 137 минг кишидан ошди. Бу борада АҚШда энг оғир вазият ҳукм сурмоқда. Мамлакатда коронавирусга чалинганлар сони 639 минг кишидан, қурбонлари сони эса 30 минг кишидан ошиб кетди.
Ўзбекистонда эса коронавирусга чалинганлар сони 1349 кишига етди.