Дональд Трамп АҚШда коронавирус ўзининг энг юқори чўққисига чиққанини маълум қилди

^{Фото: Reuters}
АҚШда коронавирус тарқалиши энг юқори чўққига чиқди, айрим минтақаларда пасайиш ҳам кузатила бошлаган. Бу ҳақда АҚШ президенти Дональд Трамп Оқ уйда ўтказилган матбуот анжумани вақтида маълум қилди, деб хабар беради «РИА Новости»га таяниб Дарё.
«Биз касалликнинг энг юқори чўққисидамиз, бунга ишончим комил. Айрим ҳолатларда пасайиш кузатилмоқда, биз жараённи бошлаб юбордик», — дейди Америка етакчиси.

Матбуот анжуманида иштирок этган вице-президент Майкл Пенснинг сўзларига кўра, коронавирус билан боғлиқ вазият энг кескин бўлган минтақаларда барқарорлашув белгилари тобора кўпроқ кузатилмоқда. Вице-президент Нью-Йорк шаҳри, Денвер ва Луизиана штатларини мисол қилиб келтирган.

Аввалроқ АҚШ разведкаси Уханда тарқалган коронавирус ҳалокатли бўлиши ҳақида ҳукуматни ноябрь ойидаёқ огоҳлантиргани маълум бўлганди.

Эслатиб ўтамиз, АҚШ вице-президенти Майкл Пенс 8 апрель куни брифинг чоғида мамлакатнинг баъзи йирик шаҳарларида коронавирус тарқалиши билан боғлиқ вазият яхшиланаётганини маълум қилганди. Трамп эса АҚШда коронавирус қурбонлари сони 100 минг кишидан камроқ бўлишига умид қилишини билдирган. Сўнгги маълумотларга кўра, АҚШда коронавирус билан касалланганлар сони 465 минг кишидан ошди, 16,6 мингдан ортиқ одам вафот этди.