Фото: EPA-EFE/TOLGA BOZOGLUТуркия президенти Ражаб Тоййиб Эрдўған 3 март куни миллатга мурожаат қилиб, мамлакатда коронавирус тарқалиши олдини олиш учун янги чоралар киритилишини эълон қилди.
“Яримтундан бошлаб 15 кунга ўпка касалликлари кенг тарқалган 30 та шаҳар ва Зонгулдак вилоятига кириш-чиқиш тақиқланади. 20 ёшдан кичиклар учун комендантлик соати киритилади. Одамлар тўпланадиган жойларда, жумладан супермаркетлар, бозорлар ва иш жойларида ниқоб тақиш шарт”, деб айтган Эрдўған TRT телеканали эфирида.
Туркия президенти, шунингдек, ижтимоий масофалашувга риоя қилишга чақирган ва кўчада бир-бирига 3 қадамдан камроқ масофага яқинлашмаслик кераклигини таъкидлаб ўтган. Шунингдек, зарур чораларга риоя қилмайдиганлар жаримага тортилади.
Эрдўған пандемиядан кейин Туркияда янги сиёсий, иқтисодий ва ижтимоий тизим қурилиши ва “энди ҳеч нарса аввалгидек бўлмаслигини” таъкидлаб ўтган.
Туркияда коронавирусга чалиниш бўйича илк ҳолат 10 мартда қайд қилинган. Ҳозирда касалланганлар сони 21 мингга яқинни, вафот этганлар 425 нафарни ташкил қилмоқда. 484 киши вирус чақирадиган касалликдан соғайиб кетган.