Соғлиқни сақлаш вазири Алишер Шодмонов Ўзбекистонда илк коронавирусга чалинган беморнинг ҳолати ҳақида хабар берди. Эслатиб ўтамиз, бугун, 15 март санасида Франциядан қайтган аёлда коронавирус аломатлари аниқлангани хабар қилинган эди.«Ушбу касаллик аниқланган фуқаро — Тошкент шаҳридан. У Францияга борган ва қайтиб келгач, касаллик аниқланган.
У икки маротаба текширувдан ўтказилди ва лаборатор усулда тасдиқланди. Шундан сўнг унинг 10 нафар оила аъзолари вирусология институтининг махсус изоляторларига ётқизилди.
Бундан ташқари, фуқаро билан самолётда бирга учган, ундан кейинги — иш жойида мулоқотда бўлганларнинг барчасини карантинга олиш ишлари давом этяпти. Яъни, биз касаллик юқиши мумкин бўлганларни изоляция қилиш чораларини кўряпмиз.
Ҳозирда беморнинг аҳволи қониқарли. Безовталик йўқ, тана ҳарорати кўтарилгани йўқ. Фақатгина томоғида озгина қичишиш белгилари бор», — деди Шодмонов.