Фото: Uzbekistan AirwaysАниқлаштирилган маълумотга кўра, Covid-19 коронавируси қайд этилган бемор — аёл киши. Бемор Париждан Тошкентга қайтгандан кейин у билан алоқада бўлган барча оила аъзолари тиббий назорат остига олинган. Бу ҳақда Gazeta.uz хабар бериб ўтди.
«Дарё» томонидан ўз манбасига таяниб маълум қилинишича, бемор аёл Францияда бир ҳафтадан ортиқ бўлиб, сўнг Ватанга қайтган.
Манба аёлнинг айнан қачон Ўзбекистонга келганига аниқлик киритмади. Flightradar24 маълумотига кўра, Uzbekistan Airways Париждан Тошкентга сўнгги икки рейсни 10 ва 13 март кунлари амалга оширган.
Коронавирусга чалинган аёл қайтган рейсда, бирламчи маълумотларга кўра, 48 йўловчи, шунингдек, экипаж аъзолари бўлган. «Уларнинг барчаси изоляцияга олинмоқда», — деди манба.
Бугун, соат 13.00да коронавирус аниқлангани ва унга қарши олиб борилаётган тиббий чора-тадбирлар ҳақида ҳукумат томонидан баёнот берилиши кутилмоқда.